!دانشمندوں کی باتیں

حماقت اور ذہانت  کے درمیان فرق یہ ہے کہ  ذہانت کی اپنی کچھ حدود ہوتی ہیں .جبکہ حماقت لا محدود ہوتی ہے .

جو ایک بار آپکو دھوکہ دیتا ہے . وہ آپ کو ہزار بار اور بھی دھوکہ دے گا .یہ جاننے کیلئے کے سمندر کا پانی کھارا  ہے .پورا سمندر پی جانے کی ضرورت نہیں ہوتی .

سچ ان لوگوں کو نفرت لگتا ہے . جو سچ سے نفرت کرتے ہیں .

اگر آپ اپنے دشمن سے کچھ چھپا کر رکھنا چاہتے ہیں . تو اسے اپنے دوست کے سامنے بھی ظاہر نہ کریں .

ہمیشہ غور سے سنیں . پہلے کہ کیاکہا جا رہا ہے . اور پھریہ  کہ کس نے کہا ہے . یا کون کہہ رہا ہے .

آپ ایک دانشمند کو دلیل سے قائل کر سکتے ہیں . لیکن کسی احمق کو ثبوت سے بھی قائل نہیں کر سکتے .

کبھی بھی بکری کے سامنے سے ، گھوڑے کے پیچھے سے اور احمق کے کسی بھی طرف سے قریب نہ جائیں .

بھیڑ اپنی ساری زندگی بھیڑیے کے خوف میں گزار دیتی ہے . لیکن آخر کار اسے چرواہا ہی کھا جاتا ہے .

جب کوئی مسخرہ  کسی محل میں منتقل ہو جاتا ہے . تو وہ بادشاہ نہیں بن جاتا . بلکہ وہ محل ہی ایک سرکس (تماشہ گاہ )بن جاتا ہے .

جب کوئی مر جاتا ہے .تو اسے یہ معلوم نہیں ہوتا کہ وہ مر چکا ہے .تکلیف دوسروں کو ہوتی ہے .یہی معاملہ اس وقت بھی ہوتا ہے .جب کوئی احمق ہوتا ہے .

گھر عذاب اور باہر ثواب

 پاکستان بننے سے  آج تک ہمیں یہی سبق پڑھایا جاتا رہا کہ سیاست دان برے ہیں  . نوکر شاہی نا اہل ہے .عوام ان پڑھ ہیں . صرف ایک ادارہ ہے .جو منظم ہے .محب وطن ہے .پاکستان کا رکھوالاہے  .ہر قسم کی آلایشوں سے پاک ہے .ملک کی نظریاتی اور جغرافیائی سرحدوں کا محافظ ہے  . اسے سیاست سے کوئی دلجسپی نہ تھی اور نہ ہے !!!!!!!!   وہ جو کچھ بھی کرتے ہیں پاکستان کے مفاد میں کرتے ہیں  ......

یعنی فوج -       

عوام بھی ہمیشہ یہ سمجھتے رہے کہ سچ یہی ہے . پاکستان کی تمام برائیوں کی جڑسیاست دان ہیں .نا اہل نوکر شاہی ہے . عوام ملک کو در پیش مسائل کو سمجھنے سے قاصر ہیں .بین الاقوامی اور خطے کے گمبھیر حالات کا تجزیہ کرنا ابھی انکے بس کی بات نہیں. ایوب خان ،یحییٰ خان ، ضیاء الحق ، پرویز مشرف ، قمر باجوہ  نے جو کچھ کیا اور اب فیلڈ مارشل جو کچھ کر رہے ہیں . انکا مقصد صرف اور صرف پاکستان کی بہتری ہے .

 

چلیں دیکھتے ہیں کہ حقیقت کیا ہے . اس میں شک نہیں کہ قائد  ا عظم کی وفات اور لیاقت علی خان کے قتل کے بعد پاکستان میں کوئی مستحکم سیاسی حکومت قائم نہ ہو سکی . سیاست دان آپس میں لڑتے رہے .اس صورت حال نے نوکر شاہی اور فوج کو سیاست میں مداخلت کا موقع دیا .اور آخر کار ایوب خان نے سیاست کا بوریا بستر گول کر کے ملک میں مارشل لاء لگا دیا . اپنے اقتدار کو طول دینے کیلئے ایوب خان نے بھی وہی کچھ  کیا . جس کا الزام وہ سیاست دانوں پر لگاتے رہے .انہی لوگوں کو اپنے ساتھ ملایا . جن کو وہ مفاد پرست قرار دیتے رہے .1965،کے انتخابات میں ایوب خان نے محترمہ فاطمہ جناح کو ہرانے کیلئے ہر غیر قانونی اور غیر اخلاقی حربہ استعمال کیا . انھیں بھارت کا ایجنٹ اور پاکستان مخالف  قرار دیا گیا .دس سال حکومت کرنے کے باوجود وہ پاکستان کو کوئی مستحکم نظام نہ دے سکے اور نہ کوئی ایسی قیادت دے سکے جو انکے بعد ملک کی باگ دوڑ سنبھال سکے . جاتے جاتے وہ اقتدار پھر ایک فوجی جرنیل یحییٰ خان کے حوالے کر گۓ. ایوبی مارشل لاء   سے ہی مشرقی پاکستان کے عوام میں ایسا احساس محرومی پیدا ہوا جس نے آگے چل کر ملک کو دو لخت کرنے کی رہ ہموار کی .

 یحییٰ خان نے اگرچہ انتخابات کرواۓ . لیکن عوام کے منتخب نمائندوں کو اقتدار منتقل کرنے پر تیار نہ ہوۓ .انکا بھی خیال تھا کہ وہ بندوق کے زور پر مشرقی پاکستان کے لوگوں کو سیدھا کر لیں گے .اسکا جو نتیجہ نکلا وہ سب کو معلوم ہے .ملک دو لخت ہونے کے بعد بھی یحییٰ خان اقتدار چھوڑنے پر تیار نہ تھے . خیر انکے بعد بھٹو صاحب اقتدار میں آۓ  .انکا دور حکومت بھی کوئی مثالی نہ تھا .  ہاں انھوں نے ملک کو ایک آئین دیا .لیکن انکا طرز عمل بھی مارشل لائی ہی تھا . ایک تو وہ جاگیر دار تھے دوسرا انکی تربیت بھی ایک فوجی جرنیل کے زیر سایہ ہوئی تھی . انھوں نے بھی ایک ڈکٹیٹر کی طرح پاکستان کو چلانے کی کوشش کی .جس کا نتیجہ 77، کے  انتخابات کے بعد ایک تحریک کی صورت میں نکلا . اس سیاسی کشمکش کو بنیاد بنا کر ضیاء الحق نے ملک میں مارشل لاء لگا دیا .

  ضیاء الحق وہ پہلا شخص تھا جس نے پاکستان میں اسلام کے نام پر منافقت کو معاشرے کی رگ رگ میں داخل کیا .90, دنوں میں انتخابات کروانے کا دعویٰ کرنے والے نے مرنے دم تک اقتدار نہ چھوڑا .اس پاکستان میں جو کچھ بھی برا ہے. اس کی ساری ذمہ داری ضیاء الحق پر ہے .صرف اور صرف اپنا اقتدار بچانے اور طول دینے کیلئے اس نے پاکستان کو امریکی جنگ میں شامل کیا . اس  دوران کلاشنکوف کلچر ، منشیات ، مذھبی منافرت نے پاکستانی معاشرے کو  ادھیڑ کر رکھ دیا. پاکستان کے طول و عرض میں قبضہ گروپ اسی دور کی پیداوار ہیں .ضیاء الحق کے بعد جتنی بھی حکومتیں آئیں . انھیں فوج نے کبھی بھی آزادانہ کام کرنے کا موقع نہیں دیا .بے نظیر ، نواز شریف دونوں کی حکومتوں کو اپنی مرضی سے بناتے اور گراتے رہے . آخر کار مشرف نے نواز شریف کا تختہ الٹ اسے جلا وطن کر دیا . 

9/11 ، کے بعد مشرف نے بھی وہی کیا جو ضیاء الحق نے کیا تھا . افغانستان پر امریکی حملے میں اس کے اتحادی بن گۓ . جن لوگوں کو روس کے خلاف ہر قسم کی امداد کی .انھیں تربیت دی .ہتھیار دئیے . انہی لوگوں کو مارنے کیلئے تیار ہو گۓ .پرویز مشرف کے اس ایک اقدام نے پاکستان میں وہ تباہی و بربادی کی .جس کی پاکستان کی تاریخ میں کوئی مثال نہیں ملتی .اور اسکا خمیازہ ہم آج تک بگھت  رہے ہیں .امریکہ تو  افغانستان سے چلا گیا .لیکن دہشت گردی کے خلاف وہ جنگ پاکستان میں آج تک جاری ہے .بے نظیر کی جان بھی اسی دہشت گردی کی نظر ہو گئی . 

مشرف کے بعد قمر باجوہ نے بھی امریکی ایما پر ایک اچھی بھلی چلتی حکومت کو چلتا کر دیا .حکومتیں گرانے ،بنانے کا کام تو یہ پہلے بھی کرتے رہے تھے . لیکن عمران خان کی حکومت گرانے کے بعد تو فوجی جنتا کھل کر سامنے آ گئی .کونسا غیر قانونی ،غیر اخلاقی کام ہے جو انھوں نے نہیں کیا .جس آئین کے تحفظ کی یہ قسم کھاتے ہیں . وہ آئین کہتا ہے کہ حکومت کی مدت پوری ہونے کے بعد عبوری حکومت  90 ، دنوں کے اندر انتخابات کراۓ گی . لیکن انھوں نے ایسا نہیں ہونے دیا .فیلڈ مارشل صاحب کے آنے کے بعد تو انھوں نے تمام حدیں پار کر دی ہیں . جس طرح لوگوں کی چادر و چاردیواری کا تقدس پامال کیا گیا .انکے گھروں کو توڑا گیا . عورتوں   کی توہین اور بچوں کو ہراساں کیا گیا .اسکی پاکستان کی تاریخ میں کوئی مثال نہیں ملتی .

 پاکستان میں آج سے پہلے بھی سیاسی لیڈر گرفتار ہوۓ ، انھیں جیلوں میں بند کیا گیا . لیکن جو ظلم عمران خان اور انکی جماعت کے دوسرے رہنماؤں اور ورکروں کے ساتھ روا رکھا جا رہا ہے .ایسا پہلے پاکستان کی تاریخ میں کبھی بھی نہیں ہوا. قیدیوں کے بھی کچھ حقوق ہوتے ہیں .جن خواتین کو جیلوں میں بند کیا گیا ہے .انکا کیا قصور ہے ؟کہتے ہیں کہ ان سب کو عدالتوں نے سزائیں دی ہیں .کیا واقعی ایسا ہے ؟ کس کو نہیں معلوم کہ ان سب کو کس کے ایما پر اور کیسے سزائیں دی گئی ہیں .

 جو کچھ بلوچستان ، کے .پی .کے اور آزاد کشمیر میں ہورہا  ہے .یہ کیوں ہو رہا ہے . کیا یہ سب وطن دشمن ہیں ؟کیا پاکستان کے شہریوں کو یہ حق حاصل نہیں کہ وہ اپنے حقوق کیلئے آواز اٹھائیں .کیا ہر مسلہ کا حل صرف بندوق ہی ہے ؟طاقت کے استعمال کا نتیجہ مشرقی پاکستان میں ہم دیکھ چکے ہیں . فیلڈ مارشل صاحب ،ایران اور امریکہ کی صلح کیلئے تو رات دن مصروف عمل ہیں .کیا پاکستان میں یہ عمل نہیں کیا جا سکتا ؟ہمیں تو  یہ گھر عذاب اور باہر ثواب والا معاملہ  لگتا ہے !!!!!

جبر و استبداد کی تاریخ

تاریخ کا سب سے بڑا سچ یہ ہے کہ تاریخ سے کوئی سبق نہیں سیکھتا .کہا بہت  کچھ جاتا ہے . صاحبان عقل و شعور اکثر یاد دہانی بھی کرا تے رہتے ہیں . لیکن طاقتوروں کے کانوں پر جوں تک نہیں  رینگتی .یہ صرف طاقتوروں کا مسلہ نہیں ہے . ہر خاص و عام - میں نہ مانوں والا رویہ رکھتا ہے .لیکن جب حالات قابو سے باہر ہو جاتے ہیں تو رونا دھونا ، چیخ و پکار ،دہایاں ،عقل سے کام لیں ، صبر کریں ،ملک کی سلامتی کو خطرے میں نہ ڈالیں ، ہم سب بھائی بھائی ہیں .اتفاق میں برکت ہے. جیسی آوازیں اٹھنی شروع ہو جاتی ہیں . 

جب ظلم کا بازار گرم کیا جا رہا ہوتا ہے . اس وقت طاقت کے نشے میں دھت لوگوں کو نہ ملک کی سلامتی کا خیال آتا ہے .نہ انسانی حقوق کی کوئی پروہ کی جاتی ہے . نہ عوام کو اپنا بھائی بند تصور کیا جاتا ہے .نہ اتفاق و اتحاد کی انکی نظر میں کوئی وقعت ہوتی ہے .وہ صرف ڈنڈے کے زور پر اپنا مطلب نکالنے پر بضد ہوتے ہیں . انکا خیال ہوتا ہے کہ انکے تمام مسائل کا حل ڈنڈا ہے . کسی بات چیت کی ضرورت نہیں . عوام -کیڑے مکوڑے ہیں .اور انہیں سیدھا رکھنے کیلئے . طاقت ہی واحد حل ہے .

پاکستان بننے سے آج تک اس طرز عمل میں کوئی خاص تبدیلی نہیں آئی . انگریز نے اپنے اقتدار کو مضبوط بنانے کیلئے . جاگیر داروں ،نوابوں ،پیروں ،سرداروں ، نوکر شاہی ،پولیس ،نیم فوجی دستوں کو منظم کیا .اسکے ساتھ ساتھ ایک باقاعدہ فوج بھی قائم کی .جس میں ہندوستان میں رہنے والی تمام قومیتوں کے لوگ شامل تھے .مسلم ،ہندو اور سکھوں کی ایک بڑی تعداد بھی اس انگریزی فوج کا حصہ تھی .لیکن اس فوج کا ایک بڑا حصہ متحدہ پنجاب کے لوگوں پر مشتمل تھا .اس میں مسلم ،ہندو اور سکھ سب شامل تھے . اس مقامی فوج کو انگریز نے نہ صرف ہندوستان میں اپنے اقتدار کو قائم رکھنے کیلئے استعمال کیا .بلکہ  پہلی اور دوسری جنگ عظیم میں ساوتھ اشیا ، افریقہ ،مشرق وسطیٰ اور یورپ میں بھی اس ہندوستانی فوج کو استعمال کیا گیا . گو اس فوج کی اکثریت مقامی تھی . لیکن اسکی قیادت تمام کی تمام  انگریز افسروں پر مشتمل تھی .بعد میں کچھ مقامی افراد کو بھی ترقی دیکر افسر بنایا گیا . یہ  ایک نوآبادیاتی  فوج تھی . بھرتی کا طریقہ کار ، تربیت ،ماحول اور انکی نفسیاتی سوچ کو انگریز نے ایک خاص مقصد کیلئے بنایا تھا . وہ تھا تاج برطانیہ سے وفاداری ! یہ فوج  اپنے قیام سے لیکر  آزادی کے وقت تک پوری تندہی سے یہ فرض ادا کرتی رہی .

پاکستان بننے کے بعد ، اس رائل انڈین آرمی کا  ایک حصہ پاکستان آرمی قرار پایا .لیکن انگریز نے اسکی جن خطوط پر تربیت کی تھی . ان میں کوئی تبدیلی نہیں ہوئی .پہلے یہ انگریز کی غلام تھی . آزادی کے بعد یہ فوج اپنے افسروں کی غلام بن گئی. انگریز افسروں کے جانے کے بعد مقامی افسر انگریز بن بیٹھے .انھوں نے اس  آزاد ملک کو  بھی نوآبادیاتی کالونی کی طرح چلانے کی کوشش شروع کر دی .اور آج تک انکے طرز عمل میں کوئی تبدیلی نہیں آئی .

 بھارت میں انکی سیاسی قیادت نے آزادی ملنے کے ساتھ ہی تمام کنٹونمنٹ ختم کر دئیے .انگریز نے جو زمینے اپنی فوج کیلئے مختص کی تھیں .وہ تمام قومی ملکیت میں لے لیں .لیکن پاکستان میں فوج نے ایسا نہیں ہونے دیا .یہاں پر کنٹونمنٹ ختم کیا ہوتے .انھوں نے مزید کنٹونمنٹ بناۓ .  بلکہ اب تو یہ پاکستان میں سب سے بڑے پراپرٹی ڈیلر بن چکے ہیں .

آج بھی انکی سوچ وہی ہے جو انگریز انکے ڈی -این -اے میں شامل کر گیا ہے . کہ یہ عوام سے افضل ہیں .یہ زیادہ پڑھے لکھے ہیں .انکے بغیر کوئی اس ملک کو سنبھال نہیں سکتا .یہ عقل کل ہیں .اور ملک کی کیا سمت ہو گی .یہ فیصلہ کریں گے .

حقیقت یہ ہے کہ ،ایوب خان ، یحییٰ خان ،ضیاء الحق ، پرویز مشرف ،اور اب عاصم منیر -ان سب نے پاکستان کا آئین توڑا. عوام کے حقوق سلب کے .عوام کے ووٹ کو کبھی بھی کوئی اہمیت نہیں دی .اور  اپنے ہی ملک کے لوگوں کے ساتھ ایسا سلوک کیا جو انگریز ایک سو نوے سالوں تک ہندوستان کے باشندوں سے کرتا رہا . ایوب خان نے 56,کا آئین ،جو پارلیمانی جمہوری تھا .اس کو ختم کر کے اپنا صدارتی آئین پاکستان پر مسلط کیا .ملک میں بنیادی جمہوریتوں کا نظام  نافذ  کیا اور اس کے تحت دھونس ،دھاندلی ،دباؤ اور لالچ کے زریعہ ،محترمہ فاطمہ جناح کو انتخابات میں شکست سے دوچار کیا .جب اقتدار چھوڑنے کا وقت آیا .تو اپنے ہی بناۓ ہوۓ آئین پرر عمل درآمد نہ کر سکا .62،کے آئین کے تحت اگر صدر کسی وجہ سے اپنے فرائض ادا کرنے سے قاصر ہو جاۓ . تو سپیکر قومی اسمبلی صدر کا عہدہ سنبھال   لے گا .آئین

پا کستان کی اسکی نظر کوئی اہمیت نہیں تھی . اسلئے ایوب خان نے اقتدار یحییٰ خان کے حوالے کیا .

یحییٰ خان نے جو گل کھلاۓ .اس کا نتیجہ پاکستان  ٹوٹنے کی صورت میں سامنے آیا . 70,کے انتخابات میں  عوامی لیگ نے سب سے زیادہ  ووٹ حاصل کیے . جمہوری اصول کے مطابق اقتدار انھیں ملنا چاہئیے تھا . لیکن فوج کی اعلی قیادت بنگالیوں کو اقتدار سوپنے کے حق میں نہ تھی .صدیق سالک ، اپنی کتاب -میں نے  ڈھاکہ ڈوبتے  دیکھا -میں لکھتے ہیں کہ یحییٰ خان کے ایک متمد  جنرل دسمبر میں مشرقی پاکستان آۓ . ایک تقریب کے دوران انھوں نے کہا ، کہ آپ فکر نہ کریں ----" ہم ان کالے حرامیوں کو اپنے اوپر ہر گز حکومت نہیں کرنے دیں گے ."اسی فوجی سوچ نے پاکستان توڑنے میں سب سے اہم کردار ادا کیا .

صدیق سالک لکھتے ہیں کہ جنرل نیازی  - 10 ، اپریل کو ڈھاکہ پہنچے اور اگلی صبح کمانڈر ایسٹرن کمان کے عہدے کا چارج سنبھال لیا . وہ لکھتے ہیں کہ جنرل خادم نے انھیں بتایا کہ جب وہ فوج کی کمان ان کے سپرد کر چکے . تو جنرل نیازی نے پوچھا 

"اپنی داشتاؤں کا چارج کب دو گے : پورے مشرقی پاکستان میں جنگ کی آگ لگی ہوئی ہے .اور کمانڈر صاحب کی سوچ کیا ہے .اسی سے اندازہ لگایا جا سکتا ہے کہ انکی نظر میں اپنے ہم وطنوں کی کیا حثیت تھی اور آج بھی کیا ہے ؟

اب ضیاالحق کا دور آتا ہے . اس نے بھی آئین پاکستان کے ساتھ جو سلوک کیا . وہ کسی سے ڈھکا چھپا نہیں .اس نے کہا تھا کہ آئین ایک چھوٹی سی کتاب ہے . میں جب چاہوں اسے اٹھا کر پھینک سکتا ہوں .پاکستان میں کلاشنکوف کلچر ،منشیات،  مذہبی منافرات  اور فرقوں کے درمیان لڑائی کو اس نے فروغ دیا .روس کے خلاف امریکی جنگ کو پاکستان کی سرحدوں کے اندر لانے والا ضیاالحق ہی تھا .اس جنگ کا خمیازہ ہم آج تک بگھت رہے ہیں .

پرویز مشرف نے اپنے ایک انٹرویو میں کہا تھا کہ آئین کاغذ کا ایک ٹکڑا ہے .اسے ردی کی ٹوکری میں پھینک دینا چاہیے .

فوجی جرنلوں نے آئین پاکستان کو ہمیشہ کاغذ کا ایک ٹکڑا ہی سمجھا . حالانکہ وہ اسی آئین کے تحت یہ حلف لیتے ہیں کہ وہ آئین پاکستان کی پاسداری کریں گے اور سیاست میں حصہ نہیں لیں گے .خود کو کمانڈو کہنے والا ،ایک امریکی دھمکی کے سامنے لیٹ گیا .افغانستان پر امریکی حملے میں انکی معاونت کی .اس ایک فیصلے سے پاکستان میں جو تباہی و بربادی ہوئی . وہ اب تاریخ کا حصہ ہے .

موجودہ چیف صاحب نے آئین پاکستان کا جو حشر کیا . اسکی مثال پاکستان کی تاریخ میں نہیں ملتی .عوام کے حقوق پر ڈاکا ڈالنے کے ساتھ ساتھ ،پاکستان میں زندگی کا کوئی شعبہ ایسا نہیں جس میں یہ مداخلت نہیں کر رہے .لیکن دعویٰ یہ ہے کہ ہمارا سیاست سے کوئی تعلق نہیں .انکی ذاتی آنا اور خواہشات ہی انکا آئین ہے .اسکے لئیے وہ اپنے سامنے آنے والی ہر رکاوٹ کو روند ڈالتے ہیں .چاہے ملک تباہ و برباد ہی کیوں نہ ہوجاۓ .

طاقت کا نشہ: کیا پاکستان کے حکمران زمینی حقائق بھول چکے ہیں؟

پاکستان میں جو کچھ اس وقت  ہو رہا ہے، اسے محض سیاسی کشمکش کہہ کر نظرانداز نہیں کیا جا سکتا۔  ملک کے طاقتور حلقوں

سےہمارا سوال ہے کہ آخروہ  چاہتے کیا ہیں؟ جو کچھ وہ ملک میں کر رہے ہیں . کیا یہ اقتدار کا غرور ہے، اپنی طاقت پر حد سے بڑھا ہوا اعتماد، یا پھر زمینی حقائق کو سمجھنے کی  آپ میں صلاحیت ہی نہیں ہے ؟

اگر آپ یہ سمجھ رہے ہیں کہ  ہر مسئلے کا حل طاقت کے  بے دریغ استعمال سے ممکن ہے ، تو آپ ایک بنیادی حقیقت بھول رہے ہیں :کہ طاقت سے لوگوں کو خاموش تو کرایا جا سکتا ہے . لیکن انکے خیالات ،شکایات ،مسائل اور سیاسی خواہشات کو ختم نہیں کیا جا سکتا ۔

پاکستان میں سیاسی اختلاف کو بارہا طاقت، پابندیوں اور انتظامی اقدامات کے ذریعے قابو کرنے کی کوشش کی گئی ہے۔ لیکن کیا ان اقدامات نے سیاسی استحکام پیدا کیا؟ یا انہوں نے ریاست اور عوام کے درمیان فاصلے مزید بڑھائے ہیں؟اقتدار کا سب سے خطرناک مرحلہ وہ ہوتا ہے جب حکمرانوں کو اپنی غلطیوں کی نشاندہی کرنے والی آوازیں سنائی دینا بند ہو جائیں۔ جب اختلاف کو دشمنی، تنقید کو بغاوت اور عوامی مطالبات کو خطرہ سمجھا جانے لگے تو فیصلہ سازی حقیقت کے بجائے خوش فہمیوں کے تابع ہو جاتی ہے۔

یہیں سے غرور سیاسی بصیرت پر غالب آنے لگتا ہے۔

پاکستان کی تاریخ ہمیں یاد دلاتی ہے کہ ریاستی طاقت اور عوامی حمایت ایک چیز نہیں۔ 1970 کے انتخابات کے نتائج کو اقتدار کی منتقلی کی بنیاد نہ بنانے اور اس کے بعد پیدا ہونے والے بحران نے بالآخر ملک کی تقسیم کی راہ ہموار کی۔ تاریخ کا سبق واضح ہے: سیاسی مسائل کا حل سیاسی عمل میں تلاش نہ کیا جائے تو ان کی قیمت پوری قوم کو ادا کرنا پڑ سکتی ہے۔

آج بھی پاکستا ن  میں بنیادی سوال یہی ہے: کیا طاقتور حلقے اختلافِ رائے اور عوامی خواہشات کو تسلیم کرتے ہوئے سیاسی راستہ اختیار کریں گے، یا یہ سمجھتے رہیں گے کہ طاقت ہی ہر مسئلے کا آخری حل ہے؟

کسی بھی ریاست کی اصل طاقت صرف اس کے اداروں کے اختیار میں نہیں، بلکہ عوام کے اعتماد، آئین کی بالادستی اور قانون کے سامنے جواب دہی میں ہوتی ہے۔

جب اقتدار کو تنقید، عوامی انتخاب اور ادارہ جاتی نگرانی کے سامنے جواب دہ نہ ہونا پڑے تو غلط فیصلوں کی قیمت صرف وہ لوگ ادا نہیں کرتے جو انہیں کرتے ہیں؛ اس کی قیمت پورے ملک کو ادا کرنی پڑتی ہے . ایسا ہمارے ساتھ پہلے بھی ہو چکا ہے ۔

سب اچھا ہے؟

جب کوئی بے وقوف مسند اقتدار پر  بٹھا دیا جاتا ہے. تو  وہ سب سے پہلا کام یہ کرتا ہے کہ صاحبان عقل کو خاموش کردیتا ہے . اسکے بعد وہ اور بے وقوفوں کو اپنے اردگرد جمع کر لیتا ہے .اسکا نتیجہ یہ نکلتا ہے کہ ساری قوم تباہ و برباد ہو جاتی ہے . ہمارے پیارے پاکستان میں ہماری آنکھوں کے سامنے یہ سب کچھ ہو رہا ہے .   بے وقوفوں اور نا اہلوں کا ایک ٹولہ

 (رومن بادشاہ نیرو ) کی طرح چین کی بانسری بجا رہا ہے اور ملک جل رہا ہے .

تاریخ سے سبق کیوں نہیں سیکھتے؟

1971،میں مشرقی پاکستان کی  علیحد گی کی ایک  بنیادی وجہ اس وقت کی فوجی  حکومت کا انتخابات کے نتائج کو تسلیم نہ کرنا تھا . ہماری تاریخ کا سب سے بڑا المیہ شاید یہ نہیں کہ ہم نے غلطیاں کیں، بلکہ یہ ہے کہ ہم نے اپنی غلطیوں سے سبق نہیں سیکھا۔

1970، کے انتخابات پاکستان کی تاریخ کا ایک فیصلہ کن موڑ تھے۔ عوام کی اکثریت نے شیخ مجیب الرحمن کی جماعت کو مینڈیٹ دیا۔پارلیمانی جمہوریت کا اصول بالکل واضح ہے : جس جماعت کو اکثریت حاصل ہو، اقتدار اسے منتقل کیا جائے۔لیکن اقتدار عوام کے منتخب نمائندوں کے حوالے کرنے کے بجائے سیاسی بحران کو طاقت کے ذریعے حل کرنے کی کوشش کی گئی۔ احتجاج بڑھا، ریاست اور عوام کے درمیان فاصلے گہرے ہوئے اور بالآخر 1971، میں پاکستان دو حصوں میں تقسیم ہوگیا۔ 

یقینآ بھارت نے مداخلت کی .بیرونی سازشیں بھی ہوئیں .عالمی طاقتوں کے اپنے مفادات بھی تھے .لیکن یہ سوال اب بھی اپنی جگہ قائم ہے کہ : 

اگر ملک کے اندر سیاسی بحران پیدا ہی نہ ہونے دیا جاتا . تو بیرونی طاقتوں کو مداخلت کا موقع کہاں سے ملتا ؟

اصل مسئلہ کسی ایک سیاسی جماعت یا شخصیت سے کہیں بڑا ہے۔مسئلہ یہ ہے کہ کیا ریاست عوام کے ووٹ کو اپنی طاقت کا سرچشمہ سمجھتی ہے، یا عوامی مینڈیٹ کو اپنے لیے ایک خطرہ؟

یہی وہ سوال ہے جس سے ہم آج بھی بھاگ رہے ہیں۔

2024، میں پاکستانی عوام نے ایک بار پھر اپنا فیصلہ سنایا۔ عمران خان جیل میں تھے، ان کی جماعت شدید ریاستی دباؤ کا سامنا کر رہی تھی، امیدواروں کو مختلف رکاوٹوں کا سامنا تھا—لیکن اس کے باوجود ان کے حمایت یافتہ امیدوار بڑی تعداد میں کامیاب ہوئے۔

پھر نتائج پر سوالات اٹھے۔انتخابی عمل پر اعتراضات سامنے آئے۔ فارم 45 اور فارم 47 کے تضادات پر بحث ہوئی۔ دھاندلی کے الزامات لگے۔ اور سب سے بڑھ کر، عوام کے ایک بڑے حصے میں یہ احساس پیدا ہوا کہ  ان کے ووٹ کو وہ حثیت نہیں دی گئی .جس کا جمہوریت تقاضا کرتی ہے ۔

اگر انتخابات صرف اس وقت معتبر سمجھے جائیں جب نتیجہ طاقتور حلقوں کی خواہش کے مطابق ہو، تو پھر جمہوریت محض ایک رسمی عمل بن کر رہ جاتی ہے۔ اور جب عوام یہ محسوس کرنے لگیں کہ ان کا ووٹ اقتدار کی سمت متعین نہیں کرتا، تو ریاستی اداروں پر اعتماد کم ہونا فطری ہے۔

یہی وہ مقام ہے جہاں 1971، کا سایہ دوبارہ نظر آتا ہے۔تاریخ کا سب سے خوفناک سبق یہ ہے کہ ریاست طاقت کے ذریعے عوام کو خاموش تو کرسکتی ہے، مطمئن نہیں ۔

بلوچستان، خیبر پختون خوا اور آزاد کشمیر کے مسائل کو صرف انتظامی یا سکیورٹی کے زاویے سے دیکھنا کافی نہیں۔ ہر خطے کے اپنے سیاسی، معاشی اور سماجی مسائل ہیں۔ ان مسائل کا مستقل حل طاقت کے استعمال سے نہیں بلکہ  سیاسی شمولیت ، آئینی حقوق ،معاشی انصاف اور مسلسل بات چیت سے   نکلتا ہے۔

ریاست کے پاس طاقت ہونا ضروری ہے، لیکن طاقت کا استعمال آخری حل ہونا چاہیے، پہلا نہیں۔ریاست بندوق سے امن تو قائم کر سکتی ہے .لیکن پائیدار امن صرف انصاف اور اعتماد سے قائم ہوتا ہے ۔

یہی فرق ایک مضبوط ریاست اور محض طاقتور ریاست میں ہوتا ہے۔

یہیں ہماری فوجی قیادت کو اپنے آپ سے ایک انتہائی تلخ سوال پوچھنا ہوگا:

کیا ہر سیاسی اختلاف واقعی قومی سلامتی کا مسلہ ہے ؟

اور پھر ایک اور سوال کا جواب بھی انھیں دینا ہو گا کہ کیا انکا طرز عمل کہیں نوآبادیاتی ذہنیت کا تسلسل تو نہیں ؟

برطانوی راج میں عوام رعایا تھے۔ ریاست کا مقصد ان پر حکومت کرنا تھا، ان سے اجازت لینا نہیں۔ آزادی کے بعد یہ ذہنیت ختم ہونی چاہیے تھی۔ مگر اگر آج بھی ریاستی ادارے یہ سمجھتے ہیں کہ عوام کو صرف نظم و ضبط سکھانا ہے، ان کی آواز سننا ضروری نہیں، تو پھر ہمیں تسلیم کرنا ہوگا کہ آزادی کے بعد بھی حکمرانی کا ایک حصہ نوآبادیاتی ذہن سے آزاد نہیں ہوا۔مسئلہ صرف فوج کا بھی نہیں۔سیاسی جماعتیں بھی ذمہ دار ہیں۔ سول حکومتیں بھی ذمہ دار ہیں۔ عدلیہ، پارلیمان، بیوروکریسی اور میڈیا—سب نے کسی نہ کسی مرحلے پر اس نظام کو سہارا دیا ہے جس میں طاقتور کو قانون سے بالاتر سمجھنے کا رجحان پیدا ہوا۔

 فوجی اسٹیبلشمنٹ  کو پاکستان میں  غیر معمولی اثر و رسوخ حاصل ہے .اس لیے سوال بھی اسی سے زیادہ سخت ہونا چاہیے:

آپ نے ١٩٧١، سے کیا سیکھا ؟کیا آپ نے یہ سیکھا کہ عوام کو زیادہ طاقت سے دبانا چاہیے؟

یا یہ سیکھا کہ عوام کے مینڈیٹ کو تسلیم کرنا چاہیے؟

اگر پہلا جواب ہے تو پھر تاریخ دوبارہ ہمارے دروازے پر کھڑی ہے۔

1971 میں ملک جغرافیائی طور پر ٹوٹا تھا۔ آج خطرہ شاید مختلف نوعیت کا ہے۔ ملک نقشے پر ایک ہو سکتا ہے، مگر اگر اس کے شہری ریاست پر اعتماد کھو دیں، اگر صوبوں کو یہ محسوس ہو کہ ان کی آواز نہیں سنی جارہی، اگر نوجوان نسل یہ سمجھنے لگے کہ ووٹ سے کچھ نہیں بدلتا. تو پھر ریاست کی  ظاہری یکجہتی کے اندر سے اسکی بنیادیں کھوکھلی ہونا شروع ہو جاتی ہیں .پاکستان کو آج مزید طاقت کی نہیں،  مزید سیاسی بصیرت کی ضرورت ہے .

اگر حکمران طبقہ یہ سمجھتا ہے کہ عوام کو ہمیشہ طاقت کے ذریعے قابو میں رکھا جاسکتا ہے تو اسے 1971 کی تاریخ دوبارہ پڑھنی چاہیے۔کیونکہ تاریخ کا فیصلہ بہت بے رحم ہوتا ہے۔ عوام کو ایک بار دھوکہ دیا جا سکتا ہے ،دوسری بار ڈرایا جا سکتا ہے اور شاہد تیسری بار دبایا بھی جا سکتا ہے .لیکن ہمیشہ کیلئے خاموش نہیں کیا جا سکتا .اور اگر ریاست نے عوام کے ووٹ کو بے معنی کردیا، تو پھر اسے یہ سوال بھی سننا ہوگا: آخر ایک شہری ریاست سے وفاداری کیوں رکھے ،اگر ریاست اسکی آواز سے وفاداری نہ کرے .1971, ہمیں متنبہ کرچکا ۔اب فیصلہ ہمارے ہاتھ میں ہے:

ہم تاریخ سے سبق سیکھیں گے، یا تاریخ کو ایک بار پھر ہمیں سبق سکھانا پڑے گا؟

!تقسیم کرو اور حکومت کرو

ا نسانی تاریخ گواہ ہے کہ حکمرانوں ،بادشاہوں نے ہمیشہ  اکثریت پر حکمرانی کرنے کیلئے انھیں مختلف گروہوں اور طبقوں میں تقسیم کیا ہے .یہ تقسیم مذہبی ، سماجی ،اقتصادی کے ساتھ ساتھ لسانی اور رنگ و نسل کی بنیاد پر بھی ہوتی تھی .جب لوگوں کو مختلف طبقوں میں بانٹ دیا جاۓ . تو  لوگوں کے درمیان اتحاد اور یک جہتی کمزور پڑ جاتی ہے . اسکا فائدہ حکمران بادشاہوں کو ہوتا تھا اور آج بھی ہو رہا ہے .اس مقصد کیلئے حکمرانوں کو دو طبقوں نے ہمیشہ مدد فراہم کی ہے . ایک مذہبی پیشوایت اور دوسرا  مالدار طبقہ . یہ ایک ایسی تکون ہے جس نے زمانہ قدیم سے آج تک انسانیت کو تقسیم کر رکھا ہے . 

یعنی حکمران طبقہ ، مذہب کے ٹھیکیدار اور سرمایہ دار ! 

ہمیں سکول میں جو تاریخ پڑھائی جاتی تھی . ہندوستان کے بارے میں اسکا لبا لباب یہ تھا کہ انگریز نے تقسیم کرو -اور حکومت کرو .....کی پالیسی کے تحت آ ہستہ آ ہستہ سارے ہندوستان پر قبضہ کر لیا .انگریز نے نہ صرف ہندو ،مسلم کی مذہبی تفریق کو اپنے مقصد کیلئے استعمال کیا بلکہ مختلف راجوں ،مہاراجوں کو ایک دوسرے کے خلاف بھی بڑی کامیابی سے استعمال کیا . مسلمانوں کو مسلمانوں کے خلاف بھی استعمال کیا . مثال کے طور پر بنگال میں سراج الدولہ کے خلاف ،میر جعفر اور ٹیپو سلطان کے خلاف ، میر صادق . نواب حیدر آباد کو بھی ٹیپو سلطان کے خلاف استعمال کیا گیا .

کہتے ہیں کہ بڑی طاقتوں کے نہ تو کوئی دائمی حلیف ہوتے ہیں اور نہ کوئی مستقل دشمن ! بلکہ انکے مفادات ہی دائمی اور مستقل ہوتے ہیں .  اسی طرح ہندوستان میں انگریز کے اپنے مفادات ہی دائمی اور مستقل تھے .حالات کے تحت دوست اور دشمن بدلتے گۓ اور آخر کار اس نے سارے ہندوستان پر قبضہ کر لیا .

اس حقیقت سے انکار ممکن نہیں کہ انگریز نے اس پالیسی کو ساری دنیا میں بڑی کامیابی سے استعمال کیا . اس حکمت عملی کو انگریز نے اپنے ملک میں بھی استعمال کیا . صنعتی ترقی کی ابتدا برطانیہ سے ہوئی . برطانیہ میں کپاس کی صنعت ، صنعتی ترقی کے ابتدائی دور کی ایک اہم مثال ہے . لنکا شائر کے کپاس کے کارخانوں میں بچے بارہ سے سولہ گھنٹے تک روزانہ کام کرتے تھے . کام کرتے کرتے وہ سو جاتے تو جگانے کیلئے انھیں زدو کوب کیا جاتا . اسکے باوجود ان میں سے کئی  بیدار نہ ہوتے اور مشینوں میں لڑھک جاتے .جس کی وجہ سے انکے ہاتھ پاؤں کٹ جاتے یا وہ مر جاتے .انکا کوئی پرسان حال نہ تھا .حالت یہ تھی کہ برطانیہ میں (1824)،تک مزدوروں کے حقوق کی انجمن بنانا غیر قانونی تھا . حکومت برطانیہ نے اشتعال دلانے والے اپنے ایجنٹ مزدوروں میں شامل کررکھے تھے .جو مزدوروں سے ایسے افعال سر زد کراتے تھے . جس کے نتیجے میں انھیں یا تو جلا وطن کر دیا جاتا یا پھانسی پر لٹکا دیا جاتا . یعنی (فالس فلیگ ) آپریشن کیے جاتے . مقصد صرف یہ تھا کہ مزدوروں میں انقلابی جذبات پیدا  نہ ہوں .....

ہمارے پیارے پاکستان میں بھی آزادی کے دن سے آج تک انگریز کی پالیسی جاری و ساری ہے . انگریز  جن خطوط پر یہاں کا نظام استوار کر کے گیا تھا . آج تک اسی پر عمل ہو رہا ہے .انتظامیہ کا ڈھانچہ جو انگریز چھوڑ کر گیا . وہ آج تک قائم ہے .جو سلوک آزادی سے پہلے عام آدمی سے ہوتا تھا . آج کے دور میں اس سے بد تر سلوک دیسی بابو اس ملک کے عوام سے کرتے ہیں . تقسیم کرو اور مزے سے حکومت کرو کی پالیسی آج تک جاری ہے .  اس پالیسی نے ملک دو لخت کر دیا .لیکن ارباب اختیار کوئی سبق سیکھنے کیلئے تیار نہیں .

اس چکر کو اب توڑنے کی ضرورت ہے .اور اسکو صرف اور صرف عوام ہی اپنی ہمت ، کوشش اور اتحاد سے توڑ سکتے ہیں .